Semprot Demam Berdarah di Rumah Gubernur

Taon 1973 ada wabah hama pohong kalapa (sexava) di daerah Sangir Talaud, kong tu pesawat-pesawat Gelatik dari Satuan Udara Pertanian (Satud Tani) da dapa tugas vor mo pi sirang akang deri udara tu pohong-pohong kalapa di sana. Mar justru di kota Manado waktu itu da timbul wabah damang badarah karna gofela aedes aegypti. Jadi kota Manado juga dorang iko sirang akang deri udara. So barang tantu tu Gubernur minta mo sirang akang depe rumah dinas capat-capat. Tu Gubernur pasti da tako jo, kalu cuma da kanal tu panyaki kong mati samantara da jadi Gubernur. Samua da bajalang menurut rencana, kong tau-tau ada telefon deri ajudan Gubernur da bilang Gubernur kata mo bicara deng petugas Satud Tani.
Trus Gubernur langsung tasambung bicara deng tu Komandan Satud Tani di dorang pe posko di lapangan terbang Mapanget..
"Siap, pak Gubernur, kita Mayor Wolai (bukang nama sebenarnya) deri Satud Tani," bagitu dapa dengar suara di telefon da manyao.
Kong Gubernur tanya, "So sirang akang pa kita pe tampa?" Trus tu Komandan Satud Tani bale batanya. "Tu tampa mana, pak Gubernur?"
"Kita pe rumah di Bumi Beringin, noh, " Gubernur manyao sadiki kras deng muka asang.
"O sudah...suudah kata..., pak Gubernur," tu Komandan balas manyao, pe abis dia batanya lebe dulu pa depe anak buah di pos komando.
"Brapa kali?" Gubernur inging tau karna ragu-ragu kalu tu gofela-gofela nyanda mati samua.
"Satu kali, pak Gubernur", tu Komandan manyao deng sadiki rasa kwai-kwai (khawatir)...
"Kiapa cuma satu kali? Sirang akang jo dua atau tiga kali... supaya butul-butul mati samua tu gofela.."
"Siap, pak Gubernur.... Mar pak Gubernur,... memang satu kali sirang so cukup beking tu gofela-gofela mati, sedang kalu dua kali sirang, tu anjing deng tusa' mungkin ta iko mati... trus kalu tiga kali sirang, orang-orang di rumah mungkin flao samua..."
"Hah?! Kalu bagitu sudah jo... stop jo, kong ngoni capat-capat pi terbang jaoh-jaoh deri sini!"

N.B. Ini cirita fakta, kenangan vor torang pe mendiang eks Gubernur Sulawesi Utara, Mayor Jenderal Purn. H.V. Worang. Sumber cirita deri eks Komandan Satud Tani, Kolonel Penerbang Purn. Soelarso Soebroto, kita pe tamang satu angkatan.

Johannes L Mundung